Экспазіцыя Made in Belarus на выстаўках UzAgroExpo і UzProdExpo ва Узбекістане

Нацыянальны павільён Рэспублікі Беларусь прадстаўлены на выстаўках сельскай гаспадаркі і прадуктаў харчавання UzAgroExpo і UzProdExpo, якія адкрыліся ў Ташкенце 24 лістапада.

Экспазіцыя беларускіх вытворцаў Made in Belarus арганізавана выставачным прадпрыемствам «Белінтэрэкспа» Беларускай гандлёва-прамысловай палаты пры падтрымцы Міністэрства сельскай гаспадаркі і харчавання Рэспублікі Беларусь, Міністэрства сельскай гаспадаркі Рэспублікі Узбекістан, Пасольства Рэспублікі Беларусь у Рэспубліцы Узбекістан.

Навінкі вытворчасці, унікальныя распрацоўкі, а таксама прадукты – лідэры продажаў дэманструюць вядучыя прадпрыемствы ў сферах харчовай прамысловасці і навукі: Слонімскі мясакамбінат, ТАА «Праймілк», ТАА «Манросці», Ваўкавыскае ААТ «Беллакт», арганізацыі Міністэрства адукацыі Рэспублікі Беларусь: Беларускі дзяржаўны ўніверсітэт, Беларускі нацыянальны тэхнічны ўніверсітэт, Беларуска-Расійскі ўніверсітэт, Беларускі дзяржаўны ўніверсітэт харчовых і хімічных тэхналогій, кандытарскія фабрыкі «Камунарка», «Спартак», «Чырвоны харчавік» і «Слодыч», Брэсцкі лікёра-гарэлкавы завод «Белалка». Інавацыйную сельскагаспадарчую тэхніку, распрацаваную спецыяльна для рынку Узбекістана, прадстаўляюць беларускія флагманы Мінскі аўтамабільны завод і прадпрыемства «Лідсельмаш» праз сваіх афіцыйных дыстрыбутараў – MAZ-TASHKENT і Belukros.