Экспазіцыя Belarus – The Taste of Nature на міжнароднай выстаўцы UzFood у Ташкенце

29–31 сакавіка ў рамках 21 Міжнароднай выставы «Прадукты харчавання, інгрэдыенты і тэхналогіі вытворчасці – UzFood» была прадстаўлена экспазіцыя Belarus – The Taste of Nature з удзелам 21 кампаніі – вытворцы харчовай прадукцыі.

Арганізатар экспазіцыі – выставачнае прадпрыемства «Белінтэрэкспа» Беларускай гандлёва-прамысловай палаты, афіцыйны прадстаўнік выставы UzFood у Беларусі. Экспазіцыя арганізавана пры падтрымцы Міністэрства сельскай гаспадаркі і харчавання Рэспублікі Беларусь, Пасольства Рэспублікі Беларусь у Рэспубліцы Узбекістан, Гандлёва-прамысловай палаты Рэспублікі Узбекістан, Савета фермерскіх, дэхканскіх гаспадарак і ўладальнікаў прысядзібных зямель Узбекістана.

У цырымоніі адкрыцця беларускай экспазіцыі прынялі ўдзел Надзвычайны і Паўнамоцны Пасол Рэспублікі Беларусь ва Узбекістане Леанід Марыніч, старшыня праўлення Асацыяцыі харчовай прамысловасці Узбекістана Бахадзір Уміршайхаў, намеснік старшыні Асацыяцыі «Узбеказікаўкатзахіра» Не'матжон Ахмеджанаў.

Падчас агляду экспазіцыі Надзвычайны і Паўнамоцны Пасол Леанід Марыніч адзначыў: «Маштабныя беларускія экспазіцыі на найбуйнейшых выстаўках ва Узбекістане сталі добрай традыцыяй. Беларуская прадукцыя добра вядомая на ўзбекскім рынку, мясцовыя спажыўцы цэняць яе за высокую якасць і натуральны смак. Пры гэтым ёсць вялікі патэнцыял для пашырэння супрацоўніцтва бізнесу нашых краін, павелічэння аб'ёмаў і пашырэння асартыменту харчовай прадукцыі, якая пастаўляецца на рынак Узбекістана».

Бахадзір Уміршайхаў, старшыня праўлення Асацыяцыі харчовай прамысловасці Узбекістана, якая аб'ядноўвае больш за 2500 харчовых арганізацый, выказаў упэўненасць, што ўдзел беларускіх прадпрыемстваў у выстаўцы дапаможа ўмацаваць гандлёва-эканамічныя адносіны паміж прадпрымальнікамі дзвюх краін і павялічыць экспарт беларускіх тавараў ва Узбекістан.

Удзельнікі экспазіцыі Belarus – The Taste of Nature прапанавалі ўвазе патэнцыйных партнёраў шырокі спектр тавараў – ад лідэраў продажаў на рынку Узбекістана да навінак вытворчасці.

Канцэрн «Белдзяржхарчпрам» прадставіў прадукцыю кандытарскіх фабрык «Чырвоны харчавік» і «Спартак», а таксама Мінскага маргарынавага завода і Слуцкага цукрарафінаднага камбіната. Мясную прадукцыю дэманстравалі наведвальнікам выставы Брэсцкі, Ваўкавыскі, Гродзенскі, Ашмянскі, Пінскі і Слонімскі мясакамбінаты. Малочны сегмент быў прадстаўлены прадпрыемствамі «Беллакт», «Белавежскія сыры», Кобрынскім масларобна-сыраробным заводам, Лунінецкім малочным заводам, Лідскім малочна-кансервавым камбінатам, кампаніямі «Малочны свет», «Малочны гасцінец» і Ашмянскім сыраробным заводам.

Па выніках работы нацыянальны павільён Беларусі на 21 Міжнароднай выставе «Прадукты харчавання інгрэдыенты і тэхналогіі вытворчасці - UzFood» у Ташкенце атрымаў дзве ўзнагароды – за лепшы дызайн стэнда і лепшую нацыянальную экспазіцыю.

Міжнародная выстаўка UzFood – найбуйнейшае спецыялізаванае мерапрыемства ва Узбекістане. Яна  праходзіць пры афіцыйнай падтрымцы Міністэрства сельскай гаспадаркі Рэспублікі Узбекістан, Міністэрства інвестыцый і знешняга гандлю Рэспублікі Узбекістан, Асацыяцыі «Узбеказікаўкатзахіра», Агенцтва па рэгуляванні алкагольнага і тытунёвага рынку і развіццю вінаробства Рэспублікі Узбекістан.

У 2022 годзе ўдзел у выстаўцы прынялі звыш за 140 кампаній з 25 краін свету: Беларусі, Бельгіі, Балгарыі, Германіі, Грэцыі, Індыі, Інданезіі, Ірана, Італіі, Казахстана, Кіргізіі, Кітая, Паўднёвай Карэі, Літвы, Нідэрландаў, ААЭ, Польшчы, Расіі, Саудаўскай Аравіі, ЗША, Турцыі, Узбекістана, Францыі, Швейцарыі і Шры-Ланкі. Выставачная экспазіцыя была прадстаўлена наступнымі раздзеламі: прадукты харчавання, напіткі, інгрэдыенты, харчовае абсталяванне і ўпакоўка. Мерапрыемства наведалі больш за 6 тысяч спецыялістаў.