Удзел старшыні БелГПП У.Улаховіча ў адкрыцці чацвёртай Кітайскай міжнароднай выстаўкі імпарту ў Шанхаі

Старшыня Беларускай гандлёва-прамысловай палаты Уладзімір Улаховіч прыняў удзел у анлайн-цырымоніі адкрыцця чацвёртай Кітайскай міжнароднай выстаўкі імпарту (CIIE) у Шанхаі.

У ходзе цырымоніі з прывітальным словам да ўдзельнікаў і гасцей выстаўкі звярнуліся Старшыня Кітайскай Народнай Рэспублікі Сі Цзіньпін, Прэзідэнт Аргенцінскай Рэспублікі Альберта Фернандэс, Прэзідэнт Рэспублікі Казахстан Касым-Жамарт Такаеў, Прэзідэнт Рэспублікі Замбія Хакаінд Хічылеме, Прэм'ер-міністр Італьянскай Рэспублікі Марыа Драгі, Прэм'ер-міністр Каралеўства Тайланд Прают Чан-Оча, выконваючы абавязкі Прэм'ер-міністра Рэспублікі Фіджы Інія Батыкота Серуірату, генеральны дырэктар Сусветнай гандлёвай арганізацыі Нгозі Аконджа-Івеала, генеральны сакратар Канферэнцыі ААН па гандлі і развіцці (ЮНКТАД) Рэбека Грынспан.

Кітайская міжнародная выстаўка імпарту – буйнейшая шматпрофільная выставачная падзея Кітая. Арганізатарамі выстаўкі выступаюць Міністэрства камерцыі КНР і Народны ўрад Шанхая. У 2021 годзе ўдзел у выстаўцы прымаюць кампаніі са 120 краін свету.

Беларусь удзельнічае ў выстаўцы CIIE чацвёрты раз. Нацыянальная экспазіцыя Рэспублікі Беларусь арганізавана Беларускай гандлёва-прамысловай палатай. Выставачны аператар – выставачнае прадпрыемства «Белінтэрэкспа» БелГПП.

У складзе Нацыянальнай экспазіцыі – прадпрыемствы харчовай прамысловасці, сферы інфармацыйных тэхналогій, а таксама міністэрствы, медыцынскія, навуковыя і навукова-вытворчыя ўстановы і ўніверсітэты.

 Айчынныя кампаніі ўдзельнічаюць у выстаўцы CIIE 2021 у дыстанцыйным фармаце, які прадугледжвае работу ў Шанхаі супрацоўнікаў выставачнага прадпрыемства «Белінтэрэкспа» БелГПП. Яны забяспечваюць правядзенне паўнацэнных бізнес-перагавораў паміж прадстаўнікамі беларускіх прадпрыемстваў і зацікаўленых у супрацоўніцтве з імі кітайскіх кампаній у фармаце відэаканферэнцыі.

Акрамя таго, да 10 лістапада для анлайн-наведвальнікаў выстаўкі даступны віртуальны павільён Рэспублікі Беларусь, выкананы з выкарыстаннем 3D-тэхналогій.