Сустрэча з прадстаўнікамі бізнесу Алжыра

У Беларускай гандлёва-прамысловай палаце адбылася сустрэча начальніка дэпартамента міжнароднага супрацоўніцтва і выставачнай дзейнасці БелГПП Аляксандра Галаварова з дэлегацыяй бізнес-колаў Алжырскай Народнай Дэмакратычнай Рэспублікі на чале з генеральным дырэктарам кампаніі SARL MPA MAZ PRODUCTION Салахам Бенбрагімам.

У ходзе сустрэчы разгледжаны перспектывы актывізацыі супрацоўніцтва беларускага і алжырскага бізнесу, прасоўвання на рынак Алжыра прадукцыі беларускіх вытворцаў – ад буйнагабарытнай тэхнікі да прадуктаў харчавання. Абмяркоўваліся магчымыя інструменты і механізмы павышэння інфармавання прадстаўнікоў алжырскіх дзелавых колаў аб патэнцыяле Беларусі і яе кампаній, магчымасці арганізацыі па лініі гандлёва-прамысловых палат абмену візітамі бізнес-дэлегацый і сумесных мерапрыемстваў, назначэння прадстаўніка БелГПП у Алжыры.

Асобна разгледжаны пытанні ўдзелу ў выставачна-кірмашовых мерапрыемствах, у тым ліку магчымасці аказання алжырскім бокам садзейнічання ў прыцягненні бізнес-колаў на экспазіцыю Belarus. The Taste of Nature у рамках міжнароднай выставы харчовай прамысловасці DJAZAGRO, якая пройдзе з 22 па 25 красавіка ў г.Алжыры, а таксама арганізацыі выставы прадукцыі алжырскіх кампаній у Беларусі.