Прававое забеспячэнне знешнеэканамічнай дзейнасці

Права БелГПП пацвярджаць сапраўднасць дакументаў, што выкарыстоўваюцца ў міжнародным эканамічным абароце (далей – пацвярджэнне сапраўднасці), замацавана абзацам 3 артыкула 20 Закона Рэспублікі Беларусь ад 16.06.2003 № 208-З «Аб гандлёва-прамысловай палаце».

Пацвярджэнне сапраўднасці БелГПП ажыццяўляецца ў адпаведнасці з Палажэннем аб парадку пацвярджэння сапраўднасці дакументаў, што выкарыстоўваюцца ў міжнародным эканамічным абароце, зацверджанымпастановай Савета Міністраў Рэспублікі Беларусь ад 30 лістапада 2007 г. № 1652.

Пацвярджэнне сапраўднасці заключаецца ва ўсталяванні і засведчанні сапраўднасці подпісаў на дакументах, якасці, у якой выступала асоба, падпісаўшая дакумент, сапраўднасці пячаткі або штампа, якімі змацаваны гэтыя дакументы.

Змест дакументаў пры пацвярджэнні сапраўднасці БелГПП не засведчваецца.

БелГПП мае права пацвярджаць сапраўднасць дакументаў, складзеных на тэрыторыі Рэспублікі Беларусь юрыдычнымі асобамі, у тым ліку іх філіялы і прадстаўніцтвы, індывідуальнымі прадпрымальнікамі, і прызначаных для выкарыстання ў міжнародным эканамічным абароце, а менавіта:

• знешнегандлёвых дагавораў;
• рахункаў (інвойсаў);
• фітасанітарных, ветэрынарных і гігіенічных сертыфікатаў;
• упаковачных лістоў;
• пісем;
• дэкларацый вытворцы;
• даверанасцей на права ажыццяўлення дзеянняў за мяжой;
• іншых.

БелГПП не ажыццяўляе пацвярджэнне сапраўднасці ў дачыненні да афіцыйных дакументаў, атрыманых ад дзяржаўных органаў і арганізацый Рэспублікі Беларусь, прызначаных для выкарыстання за мяжой, пацвярджэнне сапраўднасці якіх ажыццяўляецца шляхам консульскай легалізацыі або прастаўлення апастылю, у прыватнасці:

• дакументаў, што зыходзяць ад пракуратуры, сакратара суда або судовага выканаўцы;
• дакументаў, што зыходзяць з устаноў адукацыі;
• дакументаў, якія зыходзяць з падведамных дзяржаўных архіваў;
• адміністрацыйных дакументаў;
• натарыяльных актаў.

Інфармацыя аб устаноўленых адміністрацыйных працэдурах легалізацыі афіцыйных дакументаў, выдаваемых дзяржаўнымі органамі і арганізацыямі Рэспублікі Беларусь для выкарыстання на тэрыторыі замежных дзяржаў, знаходзіцца па спасылцы.

Для пачатку працэдуры пацвярджэння сапраўднасці заяўнік звяртаецца ў БелГПП з пісьмовай заявай за подпісам кіраўніка або ўпаўнаважанай асобы, у якой павінна быць змешчана наступная інфармацыя:

• просьба пацвердзіць сапраўднасць дакументаў з указаннем іх наймення і колькасці;
• прозвішча, імя, імя па бацьку, электронная пошта і нумар тэлефона выканаўцы.

Заяву аб пацвярджэнні сапраўднасці можна падаць:

• па адрасе вул. Камуністычная, 11, каб. 300, 220029, г. Мінск, Рэспубліка Беларусь;
• на электронную пошту legaldoc@cci.by.

Пры наяўнасці падстаў БелГПП пацвярджае сапраўднасць пасля прадстаўлення заяўнікам:

• арыгіналаў дакументаў, сапраўднасць якіх неабходна пацвердзіць;
• копіі дакумента, што пацвярджае аплату паслуг БелГПП па пацвярджэнні сапраўднасці.

Кошт паслуг БелГПП па пацвярджэнні сапраўднасці аднаго дакумента, аплата якога ў адпаведным памеры праводзіцца на падставе выстаўляемага БелГПП рахунку, складае:

• 12 рублёў 00 капеек, у тым ліку ПДВ 20% у памеры 2 рублі 00 капеек, – з заяўніка, які з’яўляецца членам БелГПП;
• 24 рублі 00 капейкі, у тым ліку ПДВ 20% у памеры 4 рублі 00 капеек, – з заяўніка, які не з’яўляецца членам БелГПП.

Пацвярджэнне сапраўднасці праводзіцца па адрасе:
вул. Камуністычная, 11, каб. 309, 220029, г. Мінск, Рэспубліка Беларусь.