Дзень гандлёвага саветніка – 2022

Беларуская гандлёва-прамысловая палата ў дзявяты раз праводзіць Дзень гандлёвага саветніка. Гэта штогадовае ўнікальнае мерапрыемства БелГПП, мэта якога – прэзентацыя прадстаўнікам замежных дыпламатычных місій эканамічнага, турыстычнага і культурнага патэнцыялу рэгіёнаў краіны. У гэтым годзе дыпламаты наведваюць Брэсцкую вобласць.   

У Дні гандлёвага саветніка – 2022 прымаюць удзел кіраўнікі і прадстаўнікі дыпламатычных устаноў 16 краін.

29 ліпеня прадстаўнікі замежнага дыпламатычнага корпуса наведалі СП «Санта Брэмар» ТАА, правялі перагаворы з кіраўніцтвам прадпрыемства, азнаёміліся з тэхналогіямі вытворчасці якасных прадуктаў харчавання, вядомых у многіх краінах свету.

У Брэсцкім аддзяленні БелГПП адбыўся бізнес-брыфінг, падчас якога старшыня БелГПП Міхаіл Мятлікаў, намеснік старшыні Брэсцкага аблвыканкама Дзмітрый Гарадзецкі, генеральны дырэктар Брэсцкага аддзялення БелГПП Валерый Лабун азнаёмілі дыпламатаў з эканамічным патэнцыялам Брэсцкай вобласці, магчымасцямі і рэсурсамі прадпрыемстваў рэгіёна.

Акрамя таго, адбылася сустрэча прадстаўнікоў замежнага дыпкорпуса са старшынёй Брэсцкага аблвыканкама Юрыем Шулейкам.

У рамках знаёмства з гісторыка-культурнай спадчынай і турыстычным патэнцыялам Брэстчыны дыпламаты наведалі Мемарыяльны комплекс «Брэсцкая крэпасць-герой» і Нацыянальны парк «Белавежская пушча».

30 ліпеня прадстаўнікі дыпмісій прадоўжаць знаёмства з рэгіёнам, наведаюць мерапрыемствы ў рамках святкавання Дня горада «Бярэсце-2022», у тым ліку першы Брэсцкі фестываль моды і стылю «LookБуг».