Мінская вобласць пашырае партнёрства з Узбекістанам: падпісаны пакет пагадненняў

З 23 па 26 верасня 2026 года дэлегацыя Мінскай вобласці на чале са старшынёй Мінскага абласнога выканаўчага камітэта Аляксеем Кушнарэнкам наведала з рабочым візітам Рэспубліку Узбекістан. Візіт быў накіраваны на ўмацаванне міжрэгіянальных сувязяў, ацэнку інвестыцыйнага патэнцыялу ўзбекскіх рэгіёнаў і развіццё прамысловай кааперацыі. У склад беларускай дэлегацыі ўвайшлі прадстаўнікі органаў улады і кіраўнікі вядучых прадпрыемстваў, у іх ліку генеральны дырэктар Мінскага аддзялення Беларускай гандлёва-прамысловай палаты Сяргей Набешка.

Візіт стаў лагічным працягам стратэгічнага партнёрства паміж Беларуссю і Узбекістанам, якое атрымала новы імпульс пасля афіцыйнага візіту Прэзідэнта Рэспублікі Узбекістан Шаўката Мірзіёева ў Беларусь 8-9 ліпеня 2026 года па запрашэнні Прэзідэнта Аляксандра Лукашэнкі. Па выніках перамоў на вышэйшым узроўні ўзбекска-беларускія адносіны выйшлі на якасна новы этап стратэгічнага партнёрства.

Тавараабарот паміж Беларуссю і Узбекістанам дэманструе ўпэўнены рост: па выніках 2025 года ён склаў амаль $855 млн, што складае 134,8 працэнта да ўзроўню 2024 года, а да 2030 года краіны маюць намер павялічыць яго да $2 млрд. Значны ўклад у агульную дынаміку ўносіць Мінская вобласць: за сем месяцаў бягучага года яе аб'ём гандлю з Узбекістанам ужо дасягнуў $150 млн, паказаўшы рост на 28% у параўнанні з аналагічным перыядам мінулага года.

Першым этапам рабочай праграмы стала наведванне Ферганскай вобласці. Хокім Ферганскай вобласці Хайрула Базораў правёў сустрэчу з беларускай дэлегацыяй, падчас якой былі абмеркаваны пытанні далейшага пашырэння ўзаемавыгаднага супрацоўніцтва, развіцця гандлёва-эканамічных сувязяў. Асаблівая ўвага была нададзена ўзаемадапаўняльнаму характару эканамічных магчымасцяў двух рэгіёнаў. Патэнцыял Ферганскай вобласці ў тэкстыльнай прамысловасці, вырошчванні і перапрацоўцы плодаагародніннай прадукцыі ў спалучэнні з магчымасцямі Мінскай вобласці ў сферы агратэхналогій, жывёлагадоўлі, машынабудавання і вытворчасці сучаснага абсталявання стварае трывалую аснову для эфектыўнай кааперацыі.

Другім этапам візіту стала наведванне Андыжанскай вобласці. Насычаная рабочая праграма беларускай дэлегацыі ўключала знаёмства з буйнымі прамысловымі комплексамі рэгіёна, падчас якога бакі вызначылі канкрэтныя нішы для інтэграцыі айчынных прадпрыемстваў. У рамках дзелавой часткі візіту генеральны дырэктар Мінскага аддзялення БелГПП Сяргей Набешка правёў сустрэчу ў Андыжанскім тэрытарыяльным упраўленні ГПП Узбекістана, дзе абмеркаваў з узбекскімі калегамі перспектывы міжпалатаўскага ўзаемадзеяння і падтрымкі бізнес-ініцыятыў.

Па выніках работы быў падпісаны маштабны пакет дакументаў аб супрацоўніцтве, які замацаваў дамоўленасці як на ўзроўні органаў улады, так і ў сферы бізнесу, адукацыі і аховы здароўя. У прыватнасці, пагадненні заключылі адміністрацыі раёнаў дзвюх краін, а таксама буйныя прамысловыя прадпрыемствы, якія плануюць кантракты на мільёны долараў.

Генеральны дырэктар Мінскага аддзялення БелГПП Сяргей Набешка падпісаў пагадненні аб супрацоўніцтве з Ферганскім тэрытарыяльным Упраўленнем Гандлёва-прамысловай палаты Рэспублікі Узбекістан і Андыжанскім тэрытарыяльным Упраўленнем Гандлёва-прамысловай палаты Рэспублікі Узбекістан. Гэтыя дамоўленасці ствараюць надзейную платформу для арганізацыі ўзаемных бізнес-місій і B2B-перамоў, адкрываюць прамыя магчымасці для рэалізацыі сумесных праектаў, спрашчаюць выхад прадпрыемстваў на рынкі абедзвюх краін і даюць магутны імпульс развіццю прамысловай кааперацыі.