Экспазіцыя Belarus – The Taste of Nature на выставах Yummex Middle East і The Speciality Food Festival у Дубаі

Экспазіцыя Belarus – The Taste of Nature прадстаўлена на 14-й Міжнароднай выставе прысмакаў і снэкаў Yummex Middle East і харчовай выставе The Speciality Food Festival, якія адкрыліся 7 лістапада ў Дубаі.

Экспазіцыя арганізавана выставачным прадпрыемствам "Белінтэрэкспа" Беларускай гандлёва-прамысловай палаты пры падтрымцы Пасольства Рэспублікі Беларусь у Аб'яднаных Арабскіх Эміратах.

У экспазіцыі прымаюць удзел вядучыя вытворцы прадуктаў харчавання з Беларусі, якія дэманструюць сваю перадавую прадукцыю. У ліку ўдзельнікаў – канцэрн "Белдзяржхарчпрам", кампанія "Бабушкіна крынка", Мінскі маргарынавы завод, прадпрыемства "Чырвоны харчавік", кандытарскія фабрыкі "Спартак", "Слодыч", "Камунарка", "Конфа", "Чырвоны Мазыранін".

Па выніках першага дня экспазіцыі беларускія ўдзельнікі заключылі пагадненні аб намерах і камерцыйныя кантракты з бізнес-партнёрамі з краін Блізкага Усходу і Афрыкі. У прыватнасці, кандытарская фабрыка "Камунарка" падпісала шматгадовы кантракт з кампаніяй з ПАР на пастаўку прадукцыі на рынак гэтай краіны і дзяржаў Персідскага заліва. Паміж Мінскім маргарынавым заводам і кампаніяй з ААЭ дасягнута дамоўленасць аб пастаўках рапсавага алею.

У 2021 годзе ў міжнародных выставах Yummex Middle East і The Speciality Food Festival бяруць удзел больш за 400 кампаній з 41 краіны, 17 дзяржаў прадставілі нацыянальныя павільёны.